23 ივნისს, ხობის ცენტრალურ სტადიონზე საერთაშორისო ოლიმპიური დღისადმი მიძღვნილი სპორტული ღონისძიება გაიმართა. 400 მეტრზე რბენაში გოგონათა შორის გამარჯვება ანი კვარაცხელიამ (ქვემო ქვალონი) მოიპოვა, ხოლო ვაჟებში აბსოლუტური ჩემპიონი ლუკა ახალაია (ქვემო ქვალონი) გახდა. ჩემპიონი ახალგაზრდები თასებითა და სიგელებით დაჯილდოვდნენ. პირველობაში მონაწილე ყველა ახალგაზრდას საქართველოს ეროვნული ოლიმპიური კომიტეტის სიგელები და მაისურები გადაეცათ. ღონისძიებას ხობის მუნიციპალიტეტის მერი გოჩა ქაჯაია და საქართველოს ოლიმპიური კომიტეტის სამეგრელო-ზემო სვანეთის რეგიონალური ორგანიზაციის გამგეობის თავმჯდომარე ლევან ლატარია ესწრებოდნენ. საერთაშორისო ოლიმპიური დღისადმი მიძღვნილი ღონისძიების მიზანი - ოლიმპიური ფასეულობების პოპულარიზაცია, ჯანსაღი ცხოვრების წესის დანერგვა და სხვადასხვა სპორტულ აქტივობებში საზოგადოების ფართო მასების ჩაბმაა.

23 ივნისს, ქალაქ ხობში, ნოდარ შენგელიას სახელობის საფეხბურთო პირველობის ფინალური მატჩები გაიმართა. ტურნირში ხობის, მარტვილის, ფოთის, სენაკის და ზუგდიდის საფეხბურთო სკოლების 2009-2010 წლებში დაბადებული ფეხბურთელებით დაკომპლექტებული რვა გუნდი მონაწილეობდა.

ფინალურ მატჩში ფოთის „კოლხეთის“ საფეხბურთო სკოლის ნორჩმა ფეხბურთელებმა მარტვილელი თანატოლები, ანგარიშით 5-3 დაამარცხეს და ტურნირის გამარჯვებული გახდნენ. ფინალურ მატჩს ხობის მუნიციპალიტეტის მერი გოჩა ქაჯაია, მერის მოადგილე მახარე ჩოკორაია და ნოდარ შენგელიას ოჯახის წევრები ესწრებოდნენ.
გამარჯვებულ და პრიზიორ გუნდებს თასები, მედლები, სიგელები და ფასიანი საჩუქრები გადაეცათ.
Facebook